رسائل القسم والحلفان ....

رسالة قوية على الموبايل ....

لأنقض على الموبايل كما ينقض الاسد على فريسته ...

: يارب تكون الرسالة الخاصة بأشتراكي فى عرض قناه برافو او ممكن تكون رسالة من فودافون .. يمكن اكون كسبت البي ام دابليو ... لالا بلاش الاحلام الكبيرة دي يا ابو السيد انتا اخرك يوم ما تكسب تكسب فانوس رمضان .

وضعت يدي على الموبايل وقرأت الرسالة

وكان بها كلمة جميلة جدا

لا اله الا الله محمد رسول الله

ما اجملها من كلمة انا عاشقها ولكن ضغطت على الاتجاه لأسفل فوجدت كلمات جعلتني اشل فكريا

وكانت الكلمات هي

هذه الرسالة أمانة فى رقبتك ليوم الدين ارسلها ل10 اشخاص وستسمع خبر جيد

: ارسلها .... ارسلها لمين 10

اللى بعتها ما يعرفنيش ولا ايه ..... دا انا حشفره .... انا يتبعتلي رسالة زي دي ..

بس اللى بعتلى الرسالة ده انسان متعلم وذميلي يعني على الاقل بيفكر ...

ليه اساء التقدير لتلك الكلمات ليرسلها لي امانه فى عنقي ... هي تهم بتتحدف علينا وخلاص

اتصلت به وقمت بأعطاؤه موشح المتعلمين كيف ترسل رسالة وانت مش قدها ليه تربط أمانه فى عنق غيرك

وكانت اجابته :

يا مان ماهو صحبك كذا هو اللى بعتهالي

: اههههههههه حتشلوني ... والتاني ده بيصلي وعارف ربنا ... فين عقله .. اقفل اقفل الموبايل يا بني انا غلطان اني اتصلت اساسا .... ما انتا قولت كده وهو اكيد حيقولي نفس الكلام ...

مافيش حد عنده وقت يفكر ..

ده غير الرسايل اللى كل يوم بلقيها على الايميل واللي الحمد لله ما برسلهاش تاني إلا لو كانت دعاء جميل

و للأسف كنت اتجول فى شوارع المنشية يوما ما ... ووجدت فتي يقوم بتوزيع ورق على الناس

ومن سوء حظي وقعت فى يدي ورقة من ما يوزعه

قمت بقرائتها

ووجدت فيها كلمات اثارت غضبي

وكانت تحكي عن ان احد اولياء الله الصالحين رأي الرسول فى منامه واوصاه ان يطبع هذه الكلمات ويوزعها على البشر وكل من يصل اليه هذه الرسالة عليه ان يقوم بنفس الامر

وإن امتنع سيسمع خبر سيء وستموت زوجته ويشرد اطفاله وتقتل قطته ويموت زرعه ويحرق بيته وسيموت مشلولا

سرعاان ما مزقت الورقة قطع ...

اتجهت لهذا الفتي وقلت له انني قد مزقت الورقة ...

وكان رد فعله غريبة اكثر

حيث اعطاني ورقة اخرى وقال لي لا تمزقها يا اخي قم بتصويرها وانشرها كما افعل ..

: نعم يا اخويا ...

: عادي يا كابتن والله عشان تتبارك كده وربنا يسهلك امورك ويوفقك ...

: ربنا حيسهلي اموري لما اخد ورقة زي دي عليها حلفان اوزعها على الناس من غير ما افكر ... انتا فين عقلك يا شيخ ؟

: يا اخي انتا نسيت حديث الرسول صلي الله عليه وسلم " بلغوا عني ولو ايه ؟؟

: جميل ... الرسول قال بلغوا عني .... صح

فين بقي البلاغ اللى مكتوب فى الورقة اللى انتا بتوزعها دي ..

: قرأ الورقة وقال لي هذا هو البلاغ

: بعد اذنك بس .... احنا بقينا فى ايام فتن ... صح

: صح

: مش ممكن اى حد يعمل نفس الورقة دي ويرسلها ولا هي حكر على ناس معينين

: لا اى حد ممكن يرسلها

: طيب انتا قولت حديث الرسول صلي الله عليه وسلم "بلغو عني ولو ايه" ... جميل

: جميل

: دلؤقتي اللى بلغ ده هل هو الرسول ... معاذ الله ؟

: لاء طبعا

: طيب جميل جدا ثانيا هل الرسول صلي الله عليه وسلم لما كان بيبلغ المسلمين كان بيحلف عليهم بالدمار والخراب كما هو مكتوب فى هذه الورقه ..

: لا طبعا

: انتا ايه شعورك دلؤقتي وانت بتوزع الورقة دي على الناس وبتحدف عليهم كلمات تسيء لينا احنا كمسلمين

: والله يا استاذ كلامك صح .. بس انا عبد المأمور والمعلم بتاعي هو اللى قالي اعمل كده

: طيب هات الورق وروح قول للمعلم بتاعك انك وزعته كله

: وفعلا اخدت منه كل الورق اللي كان معاه وروحت البيت ولسوء حظي لم اقوم بحرقه او تمزيقه

لتدخل امي غرفتي وتقوم بترتيبها

لأسمع ارتفاع صوتها قائلة

: انتا بقيت منهم يا ابو السيد ..........

من مين بقي انا مش عارف دي قضية تانية .... حنبقي نشوفلها حل ...

محمد السيد